हुंदके

चांदण्यांच्या पावलांनी तू अता येऊ नको
स्वप्न माझे चंद्रमोळी तू अता येऊ नको

कालच्या स्वप्नास माझ्या राहु दे आहे तसे
स्वप्नवेडया धुंद रात्री जाग तू देऊ नको

चंचला तू, पावसाच्या आर्ततेला साथ तू
आसवांच्या सागराला आग तू देऊ नको

जा जगाला सांग मी आहे कसा वेडाखुळा
होतीस तू माझी कधी हे मात्र तू सांगु नको

राहिले मागे जरासे जीवघेणे हुंदके
राख झाल्या आसवांना हासणे मागु नको