गाणे

गाणे उदासवाणे सारे तुझ्याविना
भेटायला मला तू येशील का पुन्हा

नयनी तुझ्या कसा मी हरवुन पार गेलो
तू सांग मी कुठे गं शोधु मला पुन्हा

होते दिले तुला मी मागे कधीतरी ते
येशील घेउनी का तू माझिया मना

थोडी हवीहवीशी, थोडी नवीनवीशी
आहेस कोण माझी सखये गं सांग ना

आहे मनात माझ्या अजुनी तुझा सुगंध
फ़ुलवी मनी फ़ुलोरे असे पुन्हा पुन्हा

मी जाणतो तुलाही माझाच नाद आहे
आहे खरेच का ही माझीच कल्पना

काही तुझ्यातले तू देशील का मलाही
रेशिमस्पर्श तो अन्‌ हळुवार कामना

माझे मला कळेना प्रारब्ध काय माझे
आलीस एकदा तू , येशील का पुन्हा